Сотталушыларға арналған электронды бiлезiк Қазақстанға 70 млрд. теңгеге түспек
АСТАНА. ҚазАқпарат - 2018 жылы сотталушыларға арналған электронды бiлезiк жүйесi енгiзiлмек. Бұл туралы бүгiн Орталық коммуникациялар қызметiнде өткен баспасөз мәслихатында ҚР Iшкi iстер министрi Қалмұханбет Қасымов мәлiм еттi.
"Электронды жүйе тек бiлезiктi кигiзiп қойып, қадағалап отыру емес. Бiлезiк - ол нәтиже. Алдымен барлық 270 аудан бөлiмшелерiне арнайы экрандар қойып, оларды бағдарламамен қамтамасыз етуiмiз керек. Сол кезде бiз бақылауда тұрған азаматты қадағалап отыра аламыз. Түрлi формалар бар: бiреуге үйден шығуға тыйым салынған, екiншiсiне қаладан шығуға, үшiншiсiне қоғамдық орындарда көрiнуге болмайды. Бiрiншi жылы бағдарламалық қамтамасыз етудi құрастырамыз. Қазiр ол бойынша жұмыс жасалуда. Ол бекiтiлгеннен соң, бiз 2017 жылы бағдарламалық жүйенi жасаймыз. 2018 жылы сотталушыларға тағылатын бiлезiктердi сатып ала бастаймыз", - дедi ол.
Министрдiң мәлiм етуiнше, электронды бақылау жүйелерiне қатысты мәселе екi жылдан берi қарастырылып келедi. Оған жалпы 70 млрд. теңге көлемiнде қаражат кетпек. 2,6 млрд. теңге тек бағдарламалық қамтамасыз етуге жұмсалады.
