Созақта ғасырдан да ұзақ жасаған кейуаналар тұрады

ТҮРКІСТАН. ҚазАқпарат - Созақ ауданында 8 наурыз – Халықаралық әйелдер күніне орай 100 жастан асқан ел аналарына құрмет көрсетілді, деп хабарлайды ҚазАқпарат Түркістан облысы әкімінің баспасөз қызметіне сілтеме жасап.

Аудан әкімі Мұхит Тұрысбеков Қарақұр ауылында тұратын 102 жастағы Сырғакүл Керімбекова мен Сызған ауылында тұратын 103 жасқа толған Дүйшет Қалаубаеваларды мерейлі мерекемен құттықтап, иықтарына орамал жауып, сый-сияпат жасады. Мерекелік гүл шоқтарын ұсынды.

«Ғасыр жасап, өмірдің ащы-тұщысын көрген әжелеріміздің өмірі баршамызға үлгі. Бұл кісілер елдің анасы. Сіздердей аналардың бата тілегі ұрпаққа күш-қуат береді. Елдің амандығын жұрттың тыныштығын тілеп, аман жүріңіздер»,- деп құттықтады аудан басшысы.

Айта кетерлігі, 1920 жылы Созақ ауылында дүниеге келген Сырғакүл Керімбекова әженің кіндігінен 4 ұл, 1 қыз тарап, бүгінде 15 немере 25 шөбере, 7 шөпшек көріп отыр. Ұжымшарда жұмысшы, сақпаншы болып ауыр жұмыс істеген. Созақ, Қаратау кеңшарында есепші болған. Саналы ғұмырын еңбек жолына арнаған аяулы жан.

Ал сызғандық Дүйшет Қалаубаева биыл 103 жасқа толды. Тыл және еңбек ардагері. «Асыл әже» медалін кеудесіне таққан. Қарт кейуана 3 қыз 2 ұлдың анасы. Бүгінде немере, шөбере, шөпшек көріп отыр.