«Startup «Bolashak» байқауы ісін жаңа бастағалы жүрген жас кәсіпкерлер үшін керемет мүмкіндік - Қ. Бишімбаев

АСТАНА. ҚазАқпарат - «Startup «Bolashak» байқауы - ісін жаңа бастағалы жүрген жас кәсіпкерлер үшін керемет мүмкіндік. Бүгін ҚР Президенті жанындағы Орталық коммуникациялар қызметінде өткен брифингте «Болашақ» қауымдастығының төрағасы Қуандық Бишімбаев осылай мәлім етті.

Оның айтуынша, «Болашақ» байқауының стартап-жобалар байқауы жастардың бизнес саласындағы бастамаларын қолдау құралдарының бірі ретінде Елбасының «100 нақты қадам» ұлттық жоспарын іске асыруға бағытталып отыр. «Жастарымызға, егер сізде қызықты бизнес-идея мен табысты бизнесмен болуға құштарлық болса, онда «Startup «Bolashak» байқауына қатысыңыз деп айтқым келеді. Бұл істерін жаңа бастап келе жатқан кәсіпкерлер үшін өз жобасын ілгерілетуі, нақты бизнес-жоспар жасауы, инвесторлармен кездесуі және ең бастысы старттық капиталды алуы үшін шынайы мүмкіндік», - дейді «Болашақ» қауымдастығы кеңесінің төрағасы Қуандық Бишімбаев.

Еске сала кетейік, жарияланып отырған байқау «Болашақ» қауымдастығының 3 грантын көздейді, I орын 7 млн. теңге, II орын 5 млн. теңге және ІІІ орын 3 млн. теңге, сондай-ақ 10 млн. теңге «BI Group» холдингінен гранттар. Байқауға Қазақстанның 18-29 жас аралығындағы барлық жас кәсіпкерлері қатыса алады. Айта кетерлігі, «Startup «Bolashak» байқауы барысын республикалық телеарналардың бірінен бақылауға болады, онда жобаны реалити-шоу форматында көрсету жоспарлануда.