Странджа кубогі – 2025: Бекзат Нұрдәулетов өзбек боксшысын бірінші раундта нокаутқа түсірді
АСТАНА. KAZINFORM — Болгария астанасы София қаласында өтіп жатқан дәстүрлі халықаралық Странджа турнирінде қазақстандық боксшы Бекзат Нұрдәулетов бірінші айқасында өзбек қарсыласын бірінші раундта нокаутқа түсірді.
86 келі салмақта ел намысын қорғап жатқан Бекзат жарыстың 1/8 финалында өзбекстандық Акмалжон Исроиловпен жекпе-жек өткізді. Алайда, тартысты басталған айқас алысқа ұзаған жоқ. Отандасымыз қарсыласын бірінші раундта-ақ нокаутқа түсірді.
Бұл Бекзаттың аталған турнирдегі алғашқы айқасы болатын. Осылайша ол турнирдің 1/4 финалына өтті. Енді ертең Нұрдәулетов франциялық Абулайе Траоремен жұдырықтасады. Франциялық боксшы өз кезегінде 1/8 финалда Кеннеди Брайннан басым болды.
Айта кетейік, осыған дейін Париж Олимпиадасында ерлер құрамасынан Қазақстан қоржынына жалғыз күмім медаль сыйлаған Нұрбек Оралбай да қарсыласын нокаудпен ұтқанын жазған болатынбыз.
