Странджа кубогі – 2025: Ерлер құрамасынан екінші боксшы жарыстан шығып қалды
АСТАНА. KAZINFORM — Болгария астанасы София қаласында өтіп жатқан дәстүрлі халықаралық Странджа турнирінде ерлер құрамасынан тағы бір боксшы жарыс жолын аяқтады.
Нақтырақ айтсақ, аталған турнирде ерлер арасында 51 келдіе ел намысын қорғаған Бекзат Алдамжаров бірінші жекпе-жегінде қарсыласына жол беріп, көрермендер қатарына қосылды.
Отандасымыз 1/8 финалдық кезеңде франциялық Ники Каммингспен жұдырықтасып, төрешілердің бірауызды шешімімен қарсыласына 1:4 есебімен жол берді.
Тартысты жекпе-жектің екінші раундында Бекзаттың қабағы жарылып кетті. Ол екі рет дәрігерлер көмегіне жүгінді. Осылайша жарақаты оның жеңілуіне әкеп соқтырды.
Осылайша, Алдамжаров кіші әлем чемпионаты аталып кеткен турнирде жарыс жолын аяқтады.
Осыған дейін, яғни кеше жарыстың бірінші күні ерлер құрамасынан тағы бір қазақстандық боксшы Дәулет Молдашев (57 келі) алғашқы айқасында-ақ жеңіліп қалған еді. Әзірге ерлер құрамасынан Бекзат Алдамжаров пен Дәулет Молдашев қана жарысты ерте аяқтады.
Естеріңізге сала кетейік, осыған дейін Айбек Оралбайдың егізі Нұрбек алғашқы айқасында қарсыласын нокаутпен жеңгенін жазған болатынбыз. Одан кейін Айбек Оралбай да қарсыласын нокаутқа түсірді.
Сонымен қатар, Бекзат Нұрдәулетов та өз кезегінде өзбек боксшысын бірінші раундта нокаутқа түсірді. Сондай-ақ Айбек Оралбай да қарсыласын нокаутқа түсірді.
