Су добы: Қазақстандық жігіттер Азия чемпионатының жартылай финалына шықты

АСТАНА. KAZINFORM - Қытайдың Чжаоцин қаласында ерлер мен әйелдер арасында ватерполдан Азия чемпионаты өтіп жатыр. Аталған додада Қазақстан ерлер құрамасы жартылай финалға шықты.

Бүгін отандастарымыз жарыстың ширек финалында Оңтүстік Кореяны 22:9 есебімен ойсырата жеңіп, жартылай финалға шықты.

Енді, 1/2 финалда біздің ватерполшылар Жапония мен Гонконг командалары арасындағы ойынның жеңімпазымен кездеседі.

Естеріңізге сала кетсек, осыған дейін Қазақстан әйелдер құрамасы турнир қожайындарымен кездесіп, 6:21 есебімен ойсырай жеңіліп қалғанын жазған болатынбыз.

Сондай-ақ, бүгін Болгария астанасында өтіп жатқан бокстан халықаралық «Странджа кубогінда» Қазақстан ерлер құрамасынан жартылай финалға 18 боксшы шыққан болатын.

Странджа турниріндегі ерлер арасындағы жартылай финал 1 наурызға жоспарланған. Ал әйелдер арасында ақтық сынға өткен спортшылардың есімі бүгін, яғни 28 ақпан күні белгілі болады. Бұл сында Қазақстанның 14 бұрымды боксшысы бар.