Су тасқыны: Қазақстан көрші елдермен мәлімет қалай алмасады
АСТАНА. KAZINFORM — Қазақстан су тасқыны жағдайына тұрақты мониторинг жүргізіп, халықаралық келісімдер аясында көрші мемлекеттермен ақпарат алмасады. Ынтымақтастық Қытай, Ресей және Орталық Азия елдерін қамтиды.
Ресеймен мәлімет алмасу
Қазақстан мен Ресей арасындағы Трансшекаралық су нысандарын бірлесіп пайдалану және қорғау туралы келісімнің 9-бабына сәйкес, тараптар гидрометеорологиялық, гидрологиялық, гидрохимиялық және су шаруашылығы ақпараттарын алмасып отырады.
— 2025 жылдың басынан Қазақстан-Ресей бірлескен жұмыс тобы істейді. Олар су тасқыны туралы мәліметтердің күн сайын алмасып отыруын қамтамасыз етеді. Іс-шараға екі елдің су шаруашылығының өкілетті ұйымдары мен жергілікті атқарушы органдары қатысады. Олар көктемгі су жіберу, гидротехникалық құрылыстар мен су нысандарының жай-күйі туралы ақпараттарды береді, — деді Су ресурстары және ирригация министрлігінен.
Биыл Қазақстан мен Ресей су тасқынына алдын ала дайындалу үшін трансшекаралық өзендер бойынша күнделікті ақпарат алмасуды бастап кетті.
— Өзгерістерге шұғыл әрекет ету үшін су шаруашылығының жай-күйіне тәулік бойы мониторинг жүргізіліп отыр. Мәлімет алмасу су тасқыны кезеңі аяқталғанға дейін жалғасады, — деп атап өтеді ведомстводан.
Қытаймен ынтымақтастық
2005 жылдан бері Қазақстан мен Қытай арасында трансшекаралық өзендерді табиғи апат болған жағдайда шұғыл хабарлау туралы келісім бар. Оның аясында тараптар су тасқыны мен мұз қату құбылыстары туралы бір-біріне ақпарат беруге міндетті.
— Шұғыл хабарлау өлшемшарттары бекітілген. Олар негізгі гидробекеттерде қолданылады: Іле — Саньдаохэцзы, Ертіс — Наньвань, Текес — Текес өзендері бойынша, — деп түсіндіреді Су министрлігінен.
Орталық Азия елдерімен ақпарат алмасу
Қазақстан Сырдария бассейндегі су шаруашылығы ахуалын үйлестіру үшін Мемлекетаралық үйлестіруші су шаруашылығы комиссиясы арқылы Қырғызстанмен және Өзбекстанмен өзара іс-қимылды жолға қойған.
— «Нарын-Сырдария су қоймалары құламасы» бойынша жедел мәліметтер алмасу тұрақты жүргізіледі. Сонымен қатар Шу және Талас өзендері бассейні бойынша Қазақстан мен Қырғызстан мемлекетаралық қолданыстағы су шаруашылығы құрылыстарын пайдалану туралы 2000 жылғы келісім аясында өзара іс-қимыл жасайды, — деді министрліктен.
Төтенше жағдай туындаған жағдайда тараптар бір-біріне дереу хабар беруге, су тасқынының алдын алу және салдарын жою үшін іс-қимылдарын үйлестіруге міндетті.
Айта кетейік, вице-премьер Қанат Бозымбаев жұмыс сапары барысында Атырау және Ақтөбе облыстарындағы қауіпті аймақтарды тексерді.
Ал еліміздің Су ресурстары және ирригация министрлігі тасқын суын қабылдау және қауіпсіз өткізу үшін еліміздің солтүстік, батыс, шығыс және орталық аймақтарындағы ірі су қоймаларынан су жіберіп жатыр.
