Су тасқыны. Құлсарыға Атырау мен Маңғыстаудан көмек келді

АТЫРАУ. KAZINFORM — Атырау облысындағы Құлсары қаласына көмекке келген сарбаздар мен маңғыстаулық төтеншеліктер бөгет салуға кірісті.

Жылыой аудандық әкімдігінің ақпаратына сүйенсек, қауіп төніп тұрған аумақтарда тасқынға қарсы жұмыстар атқарылып жатыр.

— Құлсары қаласына Атыраудағы әскери бөлімдерден 150-ге жуық сарбаз келді. Сарбаздар күндіз-түні бөгеттерде кезекшілік атқарып, жағдайды бақылауда ұстайды, — деп хабарлады аудандық әкімдіктен.

Сондай-ақ, Тұрғызба ауылдық округінде жаға бекіту жұмыстары жүргізіліп жатыр.

— Аталған аумақта Маңғыстау облыстық төтенше жағдайлар саласының 55 қызметкері мен 30 әскери сарбаз жаға бекіту жұмыстарына кірісті. Салынған әр бөгетке тәулік бойы кезекшілік қойылды. Су тасқынының ахуалы бақылауға алынды. Ал 18 наурызда тасқын су қаупі төнетін аумақтардан төрт түлік шығарыла бастады, — деп мәлім етті аудандық әкімдіктен.

Еске сала кетейік, бұған дейін Иреклі су қоймасынан қанша су келіп жатқанын хабарлаған болатынбыз.