Судан әскері президент сарайын өз бақылауына алғанын мәлімдеді

АСТАНА. KAZINFORM – Судан әскері Хартумдағы президент сарайын екі жылға жуық уақыт бойы қанды азаматтық соғыс жүргізіп келе жатқан әскери құрылым – Жедел қолдау күштерінен өз бақылауына алғанын мәлімдеді, деп хабарлайды BBC.

BBC мәліметінше, Судан әскері екі жыл бұрын қарсылас Жедел қолдау күштері ығыстырып шығарған ел астанасы Хартумды қайта бақылауына алып отыр.

Әскердің ресми өкілі Набиль Абдалла мемлекеттік телеарна эфирінде әскерилердің президент сарайын және Хартум орталығындағы министрлік ғимараттарын бақылауға алғанын мәлімдеді.

– Біздің күштер қарсыластың техникасы мен жасақтарын толық жойып, көптеген қару-жарақ пен әскери жабдықтарды қолға түсірді, – деп мәлімдеді Абдалла.

Сондай-ақ ол армияның «толық жеңіске» жеткенше күресуді жалғастыратынын айтты.

Жедел қолдау күштері бұл жағдайға қатысты түсініктеме беруден бас тартты.

Хартумда екі жыл бұрын басталған азаматтық соғыс Суданды қақтығыстар мен қантөгіске душар етті. 2021 жылы елді 30 жыл басқарған президент Омар әл-Башир биліктен кеткеннен кейін, елді әскери билік басқарды.

Хартумды қайта алу – Судан қарулы күштері үшін үлкен жеңіс болып, соғыстың бетбұрысты кезеңіне айналуы мүмкін. Соңғы апталарда әскер елдің орталық аудандарында да айтарлықтай жетістіктерге қол жеткізді.

Бейсенбі күні куәгерлер Республикалық сарай маңында дрондар мен әуе соққыларының жарылыстары болғанын хабарлады. Сенбі күні видеоүндеу жасаған Жедел қолдау күштерінің жетекшісі Хамети президент сарайын және оның айналасындағы аудандарды қорғауға уәде беріп, елдің солтүстігіндегі бірнеше қалаға жаңа шабуылдар жасауға қаупін төндірді.

БҰҰ деректеріне сәйкес, Судандағы соғыс әлемдегі ең ауқымды гуманитарлық дағдарысқа әкелді. Қақтығысқа қатысушы екі тарап та адам құқықтарының жаппай бұзылуына айыпталуда. Бейбіт келіссөздер жасау әрекеттері бірнеше рет сәтсіздікке ұшырады, өйткені екі жақ та стратегиялық аймақтарға бақылау орнату үшін күресті жалғастыруға ант берген.