Сүйінбай Аронұлының 200 жылдығына орай өткен халықаралық айтыста бас жүлдені Жандарбек Бұлғақов иеленді (ФОТО)
Облыс әкімінің орынбасары Бақтияр Өнербаев жиналған қауымды тойдың басталуымен құттықтап, ақындарға сәттілік тіледі. Б.Өнербаев айтыстың ардагері Надежда Лушниковаға шапан жапса, ақын апа тойға жырдан шашу шашты, деп хабарлайды облыс әкімдігінің баспасөз қызметінен. Айтысқа Айбек Қалиев, Айнұр Тұрсынбаева, Балғынбек Имашев, Жандарбек Бұлғақов сынды еліміздің саңлақтарымен қатар Қырғызстан, Монғолия, Қытай Халық Республикасынан ақындар қатысты. Жазушы, ҚР еңбек сіңірген қайраткері, «Қазақ әдебиеті» газетінің бас редакторы Жұмабай Шаштайұлы төрағалық еткен қазылар алқасы сөз сайысына баға берді. Ақындар айтыс барысында елдік мақсат-мұраттарды, Сүйінбай ақынның мәңгілік мұрасын, елдің береке-бірлігін асқақтата жырлады. Айтыстың қорытындысы бойынша бас жүлдеге жетісулық Жандарбек Бұлғақов ие болып, жеңіл автокөліктің кілтін алды. Ал бірінші орын астаналық Сырым Әуезханға (1 млн. теңге), екінші орын Айнұр Тұрсынбаеваға (700 мың теңге), қос үшінші орын Аягөз Серікқызы мен Қытай елінен келген Арзыгүл Қайымбекқызына (әрқайсысына 500 мың теңгеден) беріліп, жүлдегерлер мен басқа да арнайы сыйлық иелеріне қаржылай сый-сияпат ұсынылды.