Сыбайлас жемқорлыққа қарсы волонтерлік: Атыраудағы алғашқы нәтиже
Сыбайлас жемқорлыққа қарсы іс-қимыл агенттігі Атырау облыстық департаменті басшысының бірінші орынбасары Нұрлан Жахиннің айтуынша, «Сыбайлас жемқорлыққа қарсы волонтерлік» еріктілер жобасы іске қосылған.
«Жобаның мақсаты – белсенді азаматтарды, қоғамдық бірлестіктерді, жеке және квазимемлекеттік сектор субъектілерін, сондай-ақ басқа да ұйымдарды сыбайлас жемқорлыққа қарсы іс-шараларға ерікті ретінде тарту. Жоба аясында еріктілер бірнеше бағыт бойынша жемқорлыққа қарсы күресте көмек көрсете алады», - деп хабарлады Нұрлан Жахин.
Оның пікірінше, бірінші бағыт – қоғамдық бақылау. Мұның басты тармағы мониторинг жүргізіп, қорытындысымен бөлісуге байланысты болып отыр. Мониторингті мемлекеттік сатып алу порталында бағаны көтеру мәніне, бюджет қаражатын жұмсау тиімділігіне, өңірдің проблемалық мәселелеріне, тиісті жұмыс сапасы жоқ объектілерге, ауыл шаруашылығы мақсатындағы жерлерді пайдалануға, ұлттық жобаларды, өңірлерді дамыту жоспарларын іске асыруға, ақпараттың қолжетімділігін қамтамасыз ету бөлігінде заңнама талаптарының сақталуына, әлеуметтік маңызы бар мекемелердің жай-күйіне мониторинг жүргізуге болады.
Екінші бағыт – сыбайлас жемқорлыққа қарсы зерттеу және ағарту. Еріктілерге сыбайлас жемқорлық проблемаларын зерттеу, кейіннен оны жою және алдын алу бойынша ұсыныстар әзірлеу ұсынылып отыр. Сондай-ақ, студенттер арасында сыбайлас жемқорлыққа қарсы мәдениетті қалыптастыру, аталған қылмысқа қарсы шешімдерді әзірлеу, форумдар, конференциялар, семинарлар секілді іс-шараларды ұйымдастыру, фильмдер, сериалдар түсіру әдісімен контент жасауға қатыс, әлеуметтік роликтер әзірлеу бар.
Ал, Pro bono волонтерлік бағытының ауқымы кең. Бұл бағытта адвокаттар мен нотариустардың, сот орындаушыларының, кәсіподақтар мен ардагерлер ұйымдары өкілдерінің азаматтар мен еңбек ұжымдарына тегін құқықтық көмек көрсетуі көзделген. Комплаенс-офицерлерді практикалық оқыту, сыбайлас жемқорлық тәуекелдерін және оған қарсы мониторингтерді сыртқы талдауға сарапшыларды тартылады.
Төртінші бағыт – корпоративтік еріктілік. Осы орайда тұтынушыларға берілетін талондар мен түбіртектердің артқы бетіне сыбайлас жемқорлыққа қарсы баннерлерді орналастыру, сыбайлас жемқорлыққа қарсы push-хабарламаларды жіберу контентті ілгерілету атқарылады.
«Осы жоба аясында Атырау волонтерлері Исатай ауданының орталығы – Аққыстау ауылындағы кентішілік жолдарды қайта жаңарту кезінде бюджет қаражатының тиімсіз жұмсалғанын анықтады. Волонтерлер аталған ауылдағы Достық және Абай көшесіндегі асфальтбетон жабындысының бұзылғаны, шұңқырлар туралы ақпаратты Антикорға жіберді. Атап айтқанда, Исатай ауданы әкімдігінің лауазымды тұлғалары Исатай аудандық ТКШ бөлімі мен «Информстройсервис» ЖШС арасында кентішілік жолдарды реконструкциялауға 1,4 млрд теңге сомаға жасалған қолданыстағы шарт шеңберінде атқарған жұмысы туралы жалған актілерге қол қойды», -деп хабарлады департаменттің баспасөз қызметі.
Қазір бұл дерек расталып отыр. Соның нәтижесінде бюджеттің 78 млн теңгеден астам қаржысын жымқыру қаупі анықталған.
Еске сала кетелік, бұдан бұрын Атырау облысында ауруханалардың кәсіпкерлерге қарызы 1,4 млрд теңгеден асатынын жазған едік.