Сырдарияда сең жүру деңгейі қауіпті белгіден асты - Қазгидромет

АСТАНА. ҚазАқпарат - Сырдария өзенінде сең жүру деңгейі қауіпті белгіден асып кетті, деп хабарлайды «ҚазАқпарат» ХАА Қазгидрометке сілтеме жасап.

Қазгидрометтің 24 және 25 наурызға жариялаған ескертуіне сәйкес, 26-29 наурыз аралығында Қызылорда облысы аумағындағы Сырдария өзенінде мұз кептеліп, судың деңгейі көтеріледі, су тасқыны болуы мүмкін.

Сырдария-Қазалы көпірі аумағында судың қауіпті деңгейі - 743 см, 29 наурызда сең жүрген кезде оның деңгейі 751 см-ге жеткен.

Қазгидромет мамандары Сырдарияның төменгі ағысына жеткен сеңнің көлемі көбейіп, мұздың кептелетінін, салдарынан өзеннің деңгейі көтеріліп, су тасқыны болатынын болжауда.