Сырдариялық 30 отбасы баспаналы болды - Қызылорда облысы

ҚЫЗЫЛОРДА. ҚазАқпарат - Тәуелсіздік күні қарсаңында Сырдария ауданында 30 отбасы баспаналы болды. Қоныс иелерін қуанышымен облыс әкімі Қырымбек Көшербаев бөлісіп, аудан тұрғындарын Тәуелсіздік күнімен құттықтады.

Бұл туралы облыстық әкімдіктің баспасөз қызметі хабарлады.

Аудандағы аграрлық-техникалық колледждің бұрынғы жатақханасының ғимараты қайта жаңғыртылды. Бұл оқу орнында 230 студент білім алатын болса, соның 100-ге жуығы алыс ауылдардан келеді. Енді оқу орнының шәкірттері туған-туыстың үйін жағаламай жайлы жатақханада тұрады. Сондай-ақ, осы жатахана ғимаратының жартысы тұрғын үй ретінде пайдалануға берілді. 30 пәтердің 10-ы ата-анасының қамқорлығынсыз қалған балаларға, 12-сі әлеуметтік жағынан осал топтарға, 4-і бюджеттік сала қызметкерлеріне және 4 пәтер қызметтік тұрғын үй есебінен табысталды.

- Бүгін ерекше қуанышты күн. Халқымыз үшін ұлық мереке - ел Тәуелсіздігі күні қарсаңында баспаналы болып отырсыздар. Қуаныштарыңыз құтты болсын, ел тәуелсіздігі тұғырлы болсын, - деді облыс әкімі Қ.Көшербаев.