Сыртқы істер министрінің орынбасары Н.Ермекбаев Қытайға сапар жасады

АСТАНА. Шілденің 3-і. ҚазАқпарат. Қазақстан Республикасының Шанхай ынтымақтастық ұйымына төрағалығы шеңберінде, 2010 жылы 2-3 шілде күндері Бейжің қаласында ҚР Сыртқы істер министрінің орынбасары Нұрлан Ермекбаевтың ҚХР Сыртқы істер министрінің көмекшісі (орынбасар дәрежесінде) Чэн Гопинмен сыртқы істер министрліктері аралық консультациялары өтті,

деп хабарлайды СІМ баспасөз қызметі.

Консультациялар барысында тараптар Қазақстанның Ұйымға төрағалығына арналған ШЫҰ негізгі басымдықтары және Қазақстан бастамашысы болған көпжақты сипатқа ие және Ұйымның түрлі саладағы негізгі іс-шараларын айқындайтын ШЫҰ-ның 2010-2011 жылдарға арналған Іс-әрекеттер жоспарын талқылады.

Келіссөздер қазақстандық тараптың Ұйымға мүше барлық мемлекеттермен өткізетін консультациялар циклінің жалғасы болып табылады. Бірінші кездесу биыл 25-26 маусымда Мәскеу қаласында өтті. Ағымдағы жылдың шілде айында осындай консультациялар орталықазиялық әріптестермен - Қырғызстан, Тәжікстан және Өзбекстанмен өкізу жоспарланып отыр.

Сонымен қатар, Нұрлан Ермекбаев ШЫҰ Бас хатшысы Мұратбек Иманалиевпен де кездесу өткізді. Кездесу барысында Қазақстанның ШЫҰ-ға төрағалығы кезіндегі Ұйымның қызметіне қатысты мәселелер және ШЫҰ құрылуының 10 жылдығына арналған 2011 жылы маусым айында Астана қаласында өткізілетін мерейтойлық саммитті өткізуге дайындық мәселелері талқыланды.