Табиғи апатпен күресте кешенді тәсіл керек — Президент кеңесшісі
АСТАНА. KAZINFORM — Елімізде су тасқыны басқа да табиғи апаттардың алдын алуға арналған кешенді шаралар әзірленіп жатыр.
Бүгін елордада Біріккен Ұлттар Ұйымының азық-түлік және ауыл шаруашылығы ұйымы (ФАО) мен еліміздің Су ресурстары және ирригация министрлігінің ұйытқы болуымен су ресурстарын тұрақты басқару мәселелеріне арналған дөңгелек үстел өтті.
Аталған іс-шара барысында агенттік тілшісі Қазақстан Республикасы Президентінің кеңесшісі — Президенттің халықаралық экологиялық ынтымақтастық жөніндегі арнаулы өкілі Зүлфия Сүлейменовадан тасқын сумен күрес шараларына қатысты пікірін білген еді.
— Су ресурстарын тиімді басқару қажет, бұл тек қана инфрақұрылым мәселелері ғана емес, сонымен қатар табиғатқа негізделген шешімдерді де қамтиды. Су-батпақты жерлерді қалпына келтіру, суды тиімді бөлу тағы сол сияқты іс-шаралар тасқын салдарының алдын алуға мүмкіндік береді. Сондықтан табиғи апатпен күресте кешенді тәсіл керек. Өткен жылы Эр-Риядта Мемлекет басшысы мен Франция президентінің бастамасымен «One Water Summit» шарасы өтті. Мемлекет басшысы саммит барысында және Бакуде өткен COP29 конференциясында Қазақстан тәуекелдерді басқаруда кешенді жүйесін енгізетінін айтты, — деп жауап берді Зүлфия Сүлейменова тілшісі сауалына.
Сондай-ақ Президент кеңесшісі неліктен кешенді жүйе керек екенін түсіндірді.
— Өйткені, тәуекелдерді тек сақтандыру тұрғысынан қарастыру немесе тек инфрақұрылым тұрғысынан қарастыру жеткіліксіз. Барлық мәселені жан-жақты қарастыру қажет, оның ішінде экожүйені қалпына келтіру, инфрақұрылым, контрреттегіштер, су қоймалары мен басқа да нысандар салу және тәуекелдерді сақтандыру да бар, — деп толықтырды З. Сүлейменова.
Оның айтуынша, қазір Үкімет аталған бағытта белсенді жұмыс атқарып жатыр.
Бұған дейін Президенттің арнаулы өкілі Каспий теңізі итбалықтарының резерваты құрылатынын айтқан еді.
