Табиғи күн уақыты онкологиялық аурудың алдын алуға көмектеседі — Диляра Қайдарова

АЛМАТЫ. KAZINFORM —Халықаралық зерттеулер онкологиялық аурулардың алдын алу үшін табиғи күн уақытын сақтау қажеттілігін дәлелдейді. Бұл туралы еліміздің бас онкологы Диляра Қайдарова «Бірыңғай уақыт белдеуі: ғылыми аспектілер» дөңгелек үстелінде айтты. 

Оның айтуынша, 2017 жылы АҚШ ғалымдары «Уақыт белдеуіндегі бойлық жағдайы және Америка Құрама Штаттарында қатерлі ісік қаупі» атты зерттеулерін жариялады.

АҚШ-тың 600 округіндегі 4 миллион тұрғынға зерттеу жүргізілді. Нәтижие мынандай: Шығыстан батысқа қарай уақыт белдеулері бойынша күн уақытынан әрбір 5 градус озу қатерлі ісік қаупін шамамен 10% арттыратынын көрсетті.

– Күн уақытынан бұрын уақыт белдеуі және күн шыққанға дейін ояну қатерлі ісік ауруларының санын көбейтеді. Күн шыққанға дейін ояну сүт безі мен қуық асты безінің қатерлі ісігінің санын 4%-ға, лейкемияны шамамен 12%-ға, жатырдың қатерлі ісігін 10%-ға арттырады. Осылайша, халықаралық зерттеулер онкологиялық аурулардың алдын алу үшін табиғи күн уақытын сақтау қажеттігін дәлелдейді, - деді Диляра Қайдарова.

Дүниежүзілік уақытты үйлестіру шкаласына сәйкес (ағылш. Coordinated Universal time) – UTC+5 – Алматы, Астана, Шымкент, Қарағанды, Семей, Талдықорған сияқты Қазақстанның көптеген ірі қалалары үшін табиғи уақыт белдеуі, яғни табиғи уақыт.

Онкологтың пікірінше, халықтың денсаулығы үшін табиғи күн уақытына жақын тұрақты табиғи уақыт белдеулерін қолданған дұрыс.

Осыған дейін, Ғылым және жоғары білім министрлігі зерттеу алгоритмін түсіндірген еді. 

Бұдан бұрын хабарланғандай, биыл қараша айында Қазақстанда бірыңғай уақыт белдеуінің адамдарға әсері зерттелетіні мәлім болды. 

Уақыт белдеуін зерттеуге шамамен 160 млн теңге жұмсалмақ.