Таэквондошы Батырхан Төлеуғали қолаға таласу мүмкіндігінен айырылды

ПАРИЖ. KAZINFORM – Франция астанасы Париж қаласында өтіп жатқан Олимпиада ойындарында таэквондадан 80 келіде сынға түскен Батырхан Төлеуғалиға қолаға таласу мүмкіндігі бұйырмады. 

Бүгін ол 1/8 айналымда екі дүркін әлем чемпионы, италиялық Симоне Алессиомен кездесіп, қарсыласына жол берген еді. Егер қарсыласы финалға шыққан жағдайда, Батырхан Төлеуғали жұбаныш жекпе-жегін өткізіп, қола жүлдеге таласуға мүмкіндігі болар еді.

Өкінішке қарай, италиялық спортшы ширек финалда ирандық қарсыласы Мехран Бархордариден ұтылып қалды.

Осылайша, италиялыққа есе жіберген отандасымыз Батырхан Төлеуғали жұбаныш жекпе-жегіне шыға алмайтын болды.

Айта кетейік, Батырхан Төлеуғали Қазақстан сапынан Олимпиадаға қатысып жатқан ең жас атлет. Бұл – 18 жастағы спортшының тұңғыш Олимпиадасы.