Таеквондошы Теміржан Тасқын Оңтүстік Кореядағы әлем чемпионатында қола медаль алды

АСТАНА. KAZINFORM – Қазақстандық таеквондошы Теміржан Тасқын Оңтүстік Кореяның Чунчхон қаласында өтіп жатқан таеквондодан әлем чемпионатында сынға түсіп, ел қоржынына жүлде салды.  

Ұлттық олимпиада комитетінің хабарлауынша, отандасымыз 48 келіге дейінгі салмақта үшінші орын алып, қола жүлдегер атанды. 

Турнирде қарсылас шақ келтірмеген ирандық спортшы Мехди Размиян алтын жүлдені қанжығасына байлады. Ал екінші орын испаниялық Хайро Тригосқа бұйырды. Қола медаль Өзбекстаннан келген Бехруз Салимовтың еншісінде кетті. 

Айта кетелік, Қазақстан командасының қоржынында қазіргі таңда үш медаль бар. Бұған дейін Нұрай Қазнабек (59 келіге дейінгі салмақ) пен Нұрали Махмұт (55 келіге дейінгі салмақта) күміс жүлдегер атанған болатын.