Талдықорған қаласы бойынша 200 азамат мерзімді әскери қызметке шақырылады

ТАЛДЫҚОРҒАН. KAZINFORM – 2025 жылдың күзгі шақыру науқаны аясында Талдықорған қаласы бойынша 200 азаматқа мерзімді әскери қызметке шақыру жіберіледі. Бұл туралы Өңірлік коммуникациялар қызметі алаңында өткен баспасөз мәслихатында қалалық Қорғаныс істері жөніндегі басқарманың бастығы Мақсат Дүйсебеков мәлімдеді. 

Оның айтуынша, әскерге шақырылушыларды хабардар ету күнтізбелік шақыру қағаздары немесе SMS хабарламалар арқылы жүзеге асырылады.

– Хабарлама алған соң азаматтар Қорғаныс істері жөніндегі басқармаға келіп, медициналық комиссиядан өтуі тиіс. Комиссия олардың әскери қызметке жарамдылық дәрежесін анықтайды, - деді Мақсат Қуандықұлы.

Сонымен қатар ведомство өкілі мерзімді әскери қызметшілер үшін заңнамада бірқатар жеңілдік қарастырылғанын айтты.

Атап айтқанда:

• Қызмет ету кезеңінде және запасқа шыққаннан кейін 60 күнге дейін несие төлеу мерзімін шегеру (кредиттік демалыс);

• Ұлттық бірыңғай тестілеусіз (ҰБТ) жоғары оқу орындарына ақылы немесе тегін негізде түсу мүмкіндігі беріледі.

Сонымен бірге, мерзімді әскери қызметтен жалтарғаны үшін қолданыстағы заңнамада әкімшілік және қылмыстық жауапкершілік көзделген.

Баспасөз мәслихаты барысында қойылған сұрақтарға жауап берген басқарма басшысы шетелде білім алып жүрген жастарға қатысты мәселеге де тоқталды.

– Қазіргі таңда қала бойынша шетелде оқитын жастардың көбі eGov порталы арқылы ресми түрде әскерден кейінге қалдыру рәсімдемеген. Біздің мәліметтер базасы Білім және ғылым министрлігімен интеграцияланған. Егер азамат еліміздегі оқу орнында оқыса, оған автоматты түрде кейінге қалдыру беріледі. Ал шетелде оқып жүргендер eGov порталы арқылы арнайы өтініш беріп, нотариалды куәландырылған және аударылған оқу орнынан анықтаманы ұсынуы қажет, - деді Мақсат Дүйсебеков. 

Бұған дейін, Түркістан облысынан 2 500-ге жуық азамат күзгі әскерге аттанатынын жазғанбыз.