Талдықорғандағы өрт: әлеуметтік желіде жарылыс туралы ақпарат тарады
АСТАНА. KAZINFORM – Талдықорғанда жеке тұрғын үй мен шаруашылық құрылысының шатыры өртенді. Әлеуметтік желілерде оқиға кезінде жарылыс болғаны туралы ақпарат тараған.
Жетісу облысының Төтенше жағдайлар департаментінің мәліметінше, өрт туралы хабарлама сағат 21:08-де түскен.
– Оқиға орнына Төтенше жағдайлар департаментінің қызметкерлері жедел жетіп, өртті сөндіруге кірісті, – деп хабарлады ведомстводан.
Өрт тұрғын үй шатырының 60 шаршы метрін және шаруашылық құрылысының 50 шаршы метрін шарпыған.
Тілсіз жау сағат 21:50-де толық сөндірілді. Зардап шеккендер туралы ақпарат жоқ.
– Өртті сөндіруге жеке құрамнан 17 адам және 5 техника жұмылдырылды. Өрттің шығу себебі анықталып жатыр, – деп мәлімдеді ТЖД.
Ведомствоның ресми хабарламасында жарылыс емес, өрт болғаны көрсетілген. Ал әлеуметтік желілерде тараған жарылыс туралы ақпараттың мән-жайы мен қаншалықты рас екені әзірге белгісіз.
Айта кетейік, Семейде автожуудағы өрттен зардап шеккендердің бірі жансақтау бөлімінде жатыр.
