Талғарға жаңа әкім қашан сайланады

ҚОНАЕВ. KAZINFORM – Алматы облысына қарасты Талғар қаласына жаңа әкім сайланады.

ҚР Орталық сайлау комиссиясының мәліметінше, Алматы облысы Талғар ауданының аумақтық сайлау комиссиясы қала әкімінің сайлау күнін 15 желтоқсанға белгіледі.

Осыған дейін Талғар қаласының әкімі Бахыт Қуатбекұлы Күрішбеков, Талғар қаласы әкімінің орынбасары Матан Сағындық өз міндеттерін тиісті деңгейде атқармағаны үшін лауазымдарынан босатылғаны туралы жазған едік.

Еске салайық, 4 қазанда Талғар қаласындағы төбелестен бір адам мерт болды.

Ашулы талғарлықтар жасөспірім өліміне байланысты наразылыққа шықты.

Артынша, Талғар ауданы әкімі аппаратының басшысы Аслан Қасымбаев қызметінен қуылды. Ал, Талғар ауданының әкімі Танат Есенкелдіұлы Айдарбеков және оның орынбасары Айбек Дүйсембекұлы Бидаев «сөгіс» алды.

Ішкі істер министрлігінің өкілдері БАҚ қызметкерлеріне Шерзат Болат қаза болған жерде камераға түсіп қалған видеоны көрсетті.

Прокуратура соттың ашық өтуін сұрайтындарын жеткізді.