Танысына 2 млн теңге несие алдыртып, төлемей қойған ақмолалық істі болды
КӨКШЕТАУ. ҚазАқпарат - Ақмолалық танысына 2 миллион теңге несие алдыртып, артынша төлемей кеткен. Осыған байланысты күдіктінің үстінен сотқа дейінгі тергеу амалдары қолға алынды, деп хабарлайды ҚазАқпарат тілшісі облыстық Полиция департаментінің баспасөз қызметіне сілтеме жасап.
Ведомствоның мәліметінше, биылғы жылғы 24 тамызда Целиноград аудандық полиция бөліміне алаяқтықтың құрбаны болған Нұр-Сұлтан қаласының 49 жастағы тұрғынынан арыз түскен.
«Ер адам ағымдағы жылғы 16 наурызда танысының сеніміне кіріп, банктен оның атына 2 миллион 565 мың теңге сомасында несие ресімдеген. Кейін ақша қолға тиген соң оны төлемеген», - деді ведомстводан.
Бұл іс Қылмыстық кодекстің 190 бабының 1-ші бөлігі «алаяқтық» бойынша сотқа дейінгі тергеудің бірыңғай тізіліміне тіркелді.
Қазіргі уақытта тергеу барысында істің мән-жайы анықталып жатыр.
