Таразда 14 жастағы мектеп оқушысы өзіне қол жұмсады

ТАРАЗ. KAZINFORM — Қызды үйінен анасы тауып алған. Оқиға орнына жеткен жедел жәрдем көмек көрсете алмады, деп хабарлайды Kazinform тілшісі. 

Қайғылы жағдай 23 қыркүйек күні күндіз Таразда болған. Анасы біраз уақытқа үйден шығып кеткенде, қызы қорада асулы күйде табылған. Оқиға орнына келген дәрігерлер оның көз жұмғанын растады.

№26 орта мектептің 9-сынып оқушысы неге мұндай қадамға барғаны әзірге белгісіз.

Қазір оқиғаның себептері анықталып жатыр, полиция тиісті тергеу шараларын жүргізіп жатыр. Бұл факті бойынша Қылмыстық кодекстің 105-бабы 3-бөлігі («Өзін-өзі өлтіруге жеткізу») бойынша іс қозғалды.

Қаза болған қыз соңғы екі айда өңірде өмірімен қош айтысқан жетінші бала.

– Бұл жағдайға байланысты облыстық психологиялық қолдау орталығының жұмыс тобы құрылып, отбасыға қажетті психологиялық көмек көрсетілді. Айта кету керек, марқұм ешқандай есепте тұрмаған, үлгерімі жақсы болған, сабырлы, айналасындағылармен жақсы қарым-қатынаста болған. Тәртіп бұзу фактілері тіркелмеген, – делінген облыстық білім басқармасының хабарламасында.

Еске салсақ, жазда Жамбыл облысында бірнеше күн айырмашылықпен Түймекент пен Дихан ауылдарының жасөспірімдері, сондай-ақ Тараз қаласының бір баласы өз-өзіне қол жұмсаған еді. 

Айта кетелік Биыл Жамбыл облысында балалар арасында суицид жиілеп тұрғаны жайында жазған едік.