Таразда әскери қызметшінің отбасында үшем дүниеге келді

АЛМАТЫ. ҚазАқпарат - Тараз қаласында орналасқан Ұлттық ұланның 5513 әскери бөлімінде қызмет ететін кіші сержант Мақсат Иманбетовтің отбасында үш бірдей ұл бала дүниеге келді, деп хабарлайды ҚР Ұлттық ұланы «Оңтүстік» өңірлік қолбасшылығының баспасөз хатшысы Айдос Байшағыров.

«Үлкен қуаныш Тараз қаласында орналасқан Ұлттық ұланның 5513 әскери бөлімінің әскери қызметшісі кіші сержант Мақсат Иманбетовтың отбасында болды. Мақсаттың жұбайы Аида Жебегенқызы үшемді аман-есен босанып, отбасына зор бақыт сыйлады. Қазіргі уақытта үшемнің жағдайы жақсы, оларға Дархан, Шерхан, Ерхан деген ат қойылды», - деді А.Байшағыров.



Оның айтуынша, үшемді перзентханадан шығарарда Иманбетовтер отбасын құттықтауға қалалық «Нұр Отан» партиясы мен әкімдік өкілдері және 5513 әскери бөлімінің қолбасшылық құрамы келген.