Таразда «Қазақстанның үздік тауары» аймақтық байқау-көрмесі өткізілді
«Жамбыл облысының көрсетері, айтары мол. Алда ауыл шаруашылығы өнімдерін қайта өңдеуге қатысты жоспарлар бар, сауда-өнеркәсіптік-логистикалық кластер құру да ойда бар», - деді өз сөзінде облыс әкімі Қанат Бозымбаев.
Ол атап өткендей, жыл өткен сайын аймақта жаңа өнеркәсіп ошақтары пайда болып, жергілікті фирмалар шығаратын тауарлар саны артуда.
«Қазақстанның үздік тауары» аймақтық байқау-көрмесінің мақсаты, кәсіпорындар мен ұйымдардың қызмет белсенділігін арттыру, отандық тауарлардың сапасын арттыру, Қазақстан рыногын жоғары сапалы әрі бәсекеге қабілетті өніммен қамтамасыз ету, деп атап өтті аймақ басшысы.
Көрмеде облыс аумағында өндірілетін үздік тауарлар қойылды. Қазылар алқасы осылардың ішінен үздіктерді анықтады.
«Тұрғындарға арналған тауарлар» аталымында «Амангелдігаз» ЖШС, «Айвенго» ЖШС және «Айналайын» ҚБ үздік атанды.
«Үздік азық-түлік өнімдері» аталымында таңдау «Мерке сыр зауыты» ЖШС (1-інші орын), «Ақ ниет» ҰШ (2-інші орын), «Тамақ» ЖШС-іне (3-інші орын) түсті.
Кубоктардан бөлек, жеңімпаздар елеулі ақшалай сыйақыға ие болды.
Үздік кәсіпорындар Астана қаласында биылғы жылдың қараша айында өткізілетін «Алтын сапа» республикалық байқауына қатысады.