Таразда жасөспірім әкесінің көлігін айдап кетіп, полициядан қашқан
ТАРАЗ. KAZINFORM — 14 наурыз түнгі уақытта қала көшелерінің бірінде патрульдік полиция инспекторлары Hyundai Sonata автокөлігін жас бала жүргізіп бара жатқанын байқаған.
Жүргізуші полиция қызметкерлерінің көлікті тоқтату туралы заңды талабына бағынбай, қауіпті маневрлар жасап, бой тасаламақ болған.
Жолдың басқа қатысушыларына қауіп төндірмес үшін құқық бұзушыны бірнеше экипаж қоршап тоқтатуға тура келді.
Тексеру барысында оның кәмелетке толмағаны және автокөліктің әкесіне тиесілі екені анықталды.
Жасөспірімнің заңды өкілі шақырылып, түсіндіру жұмыстары жүргізілді. Оған қатысты төрт әкімшілік хаттама толтырылды. Автокөлік айып тұрағына қойылды.
Айта кетелік әлеуметтік желіде тікелей эфирге шыққан шымкенттік көлік жүргізушісі жауапқа тартылған еді.
