Тараздағы 1 439 көппәтерлі үйге жылу 12 қазаннан беріле бастайды
АСТАНА. KAZINFORM – Таразда жылу беру маусымы 8 қазанда басталады. Тұтынушыларды жылу жүйесіне қосу кезең-кезеңімен жүргізіледі, деп хабарлайды Kazinform агенттігінің тілшісі.
Жылу беру маусымы алдымен әлеуметтік нысандарды жылу жүйесіне қосудан басталады. Тұрғын үйлерге жылу 12 қазаннан бастап беріледі. Барлық жұмысты бес күнтізбелік күн ішінде аяқтау жоспарланған.
Тараз қаласының әкімдігінің мәліметінше, жылу беру мерзімі әкімнің 7 қазандағы өкімімен бекітілген. Тұтынушыларды қосу екі кезеңмен жүргізіледі.
8 қазан түнгі сағат 00:00-ден бастап әлеуметтік нысандарға жылу беріледі. Бірінші кезекте денсаулық сақтау, білім беру ұйымдары және басқа да әлеуметтік маңызы бар нысандар қосылады.
Екінші кезең 12 қазан түнгі сағат 00:00-де басталады. Бес күн ішінде 1 439 көппәтерлі тұрғын үйді орталықтандырылған жылу жүйесіне қосу жоспарланған.
Жылу беруді бастамас бұрын үйлерді басқару органдары, ПИК және ОСИ үй ішіндегі жылу желілері мен жабдықтарын тексеруі қажет. Сондай-ақ мамандардың жылу тораптарына кіруіне жағдай жасалуы тиіс. Тұрғындардан пәтерлердегі жылу жүйелерін жөндеу жұмыстарын аяқтау сұралды.
Әкімдік жауапкершіліктің бөлінгенін еске салды. Жылу желілері жылу тасымалдағышты үйдің кіреберісіне дейін жеткізіп, элеватор тораптарын қосады. Ал ғимарат ішіндегі жылуды іске қосу, реттеу және оған қызмет көрсету жұмыстарын үйлерді басқару органдары, ПИК және ОСИ қамтамасыз етеді.
Жылумен қамту мәселелері бойынша тұрғындар «Таразтрансэнерго» диспетчерлік қызметіне 34-37-28 нөмірі арқылы және «Жамбыл-Жылу» диспетчерлік қызметіне 34-43-28 нөмірі арқылы тәулік бойы хабарласа алады.
Осыған дейін жылу берілген тұрғын үйде пәтер жылымаса, қайда жүгіну керектігі туралы жаздық.
