Ташкентте ШЫҰ-ға мүше мемлекеттер Ұлттық үйлестірушілері кеңесінің кезекті отырысы өтеді

АСТАНА. Қыркүйектің 7-сі. ҚазАқпарат /Ернұр Ақанбай/ - Қыркүйектің 10-11 -і аралығында Ташкентте  Шанхай ынтымақтастық ұйымына (ШЫҰ) мүше мемлекеттердің Ұлттық үйлестірушілері кеңесінің кезекті отырысы өтеді,

деді бүгін Астанадағы апталық брифингте ҚР Сыртқы істер министрлігінің ресми өкілі Ержан Ашықбаев.

Оның айтуынша, Ұлттық үйлестірушілер ШЫҰ-ға мүше елдер  Мемлекет басшылары кеңесінің, Үкімет басшылары кеңесінің және Сыртқы істер министрлері кеңесінің бұған дейінгі отырыстарының нәтижесінде  қабылданған шешімдердің жүзеге асырылу барысын  қарастырады. «Алда Бейжіңде өтетін ШЫҰ-ға мүше мемлекеттер Үкімет басшыларының отырысына дайындық барысымен байланысты тәжірибелік шаралар, сондай-ақ, Ұйымның ағымдағы қызметіндегі өзге де өзекті мәселелер талқыланып, келісілетін болады», деді Е. Ашықбаев.