Ташкенттегі Ислам өркениеті орталығында өрт болды

АСТАНА. KAZINFORM – Ташкенттің Алмазар ауданында Ислам өркениеті орталығының салынып жатқан ғимаратынан өрт шықты, деп хабарлайды Өзбекстанның Төтенше жағдайлар министрлігі.

Ведомствоның хабарлауынша, өрт ғимараттың шатырын арнайы материалмен қаптау кезінде технологиялық процестің бұзылуы салдарынан шыққан.

- Ел астанасының бас басқармасына өрт туралы хабар 19 тамыз, сейсенбі күні сағат 11:11-де түскен. Өрт сағат 11:32-де ауыздықталып, 11-34-те толықтай сөндірілді,  - деп хабарлады министрліктен.

Өрт салдарынан ешкім зардап шеккен жоқ. Ғимараттың негізгі бөлігі бүлінбеген. Жалпы аумағы 19 шаршы метрді құрайтын шатырды қаптайтын материал жанып кетті.

Оқиға орнына Өзбекстан премьер-министрі Абдулла Арипов барды.

Ислам өркениеті орталығын салу бастамасын 2017 жылы Өзбекстан президенті Шавкат Мирзиеев көтерген болатын. Оның іргетасы2018 жылы қаланды.

Осыған дейін Испанияда ЮНЕСКО тізіміндегі Кордова мешіті өртенгені туралы жаздық.