Тәуелсіздік күні қарсаңында 75 тараздық жас отбасыға пәтер кілттері тапсырылды

ТАРАЗ. ҚазАқпарат - Қазақстан Республикасы Тәуелсіздігінің 23 жылдығын мерекелеу қарсаңында Таразда жас отбасыларға пәтер кілттері тапсырылды, деп хабарлады Жамбыл облысы әкімінің баспасөз қызметінен.

75 пәтерлік тұрғын үй облыс орталығының оңтүстік-батыс бөлігіндегі «Бәйтерек» жаңа шағынауданында бой көтерген. Бұл тұрғын үй «Қолжетімді баспана-2020» бағдарламасының аясында жас отбасыларға арнап салынған. Жамбыл облысы әкімінің орынбасары Бекболат Орынбеков атап өткендей, 2020 жылға қарай 2,8 млн. шаршы метрден астам баспананы пайдалануға беру үшін «Қолжетімді баспана-2020» мемлекеттік бағдарламасын орындауға аймақтың барлық мүмкіндіктері бар. 2010 жылдан бастап аймақта тұрғын үйлерді пайдалануға беру жоспары асыра орындалуда - соңғы екі жылда ғана 442 мың шаршы метр баспана пайдалануға берілді. «Самұрық-Қазына» жылжымайтын мүлік қоры» АҚ желісі бойынша Таразда аумағы 5,6 мың шаршы метр болатын 2 тұрғын үй салынған.