«Тауға бармаңыздар!»: ШҚО құтқарушылары ескерту жасады
ӨСКЕМЕН. KAZINFORM – Шығыс Қазақстан облысында 14 наурызға дейін қар көшкіні жүру қаупі жоғары.
ШҚО Төтенше жағдайлар баспасөз қызметінің мәліметіне сүйенсек, 11-14 наурыз аралығында өңірдің таулы жерлерінде қар көшкіні жүру қаупі сақталады.
- Метеорологиялық жағдайдың өзгеруіне, жиі қар жаууына және желдің күшеюіне байланысты облыстың таулы жерлерінде қар көшкіні түсуі ықтимал. Осы ретте, тұрғындарға барынша абай болуды, ешбір жағдайда тауға шықпау қажеттігін ескертеміз. Егер қандай да бір қиындыққа тап болсаңыздар бірден «112» нөміріне қоңырау шалыңыз, - деп хабарлады ведомство өкілдері.
Сондай-ақ құтқарушылар өңір жұртшылығына алыс сапарға шығар алдында жолдардың жай-күйін «Дәрмен» мобильді қосымшасы арқылы тексеріп отыруға кеңес берді.
Еске салсақ, бұған дейін Шығыс Қазақстан облысында жасанды жолмен қар көшкіні түсірілгені хабарланған.
