Таяу Шығыстағы ахуал: Туризм министрлігі қазақстандық саяхатшыларға ескерту жасады

АСТАНА. KAZINFORM – Туризм және спорт министрлігі Таяу Шығыстағы ахуалға байланысты қазақстандық саяхатшыларға ескерту жасады. 

 – Құрметті туристер! Қазақстан Республикасы Көлік министрлігі Азаматтық авиация комитетінің Таяу Шығыстағы жағдайға байланысты хабарламасына сәйкес, Иран, Израиль, Сирия, Ирак, Иордания және Ливан аумағында, әуе кеңістігінде және оған жақын аймақтарда ұшуға толық тыйым салынғанын хабарлаймыз. Бұл шектеу арнайы бұйрық шыққанға дейін күшінде болады. Аталған ведомствоның нұсқауы отандық әуе тасымалдаушылардың барлық тұрақты және тұрақсыз жолаушылар, жүк, сондай-ақ техникалық рейстеріне қатысты, - делінген хабарламада. 

Осы жағдайға байланысты минтсрлік туристерден жағдайды жіті қадағалап, сапарларын, әсіресе БАӘ мен Парсы шығанағы елдеріне баруды мұқият жоспарлауды сұрап отыр. 

– Аталған өңірдегі ахуал өзгерген жағдайда, Қазақстанның Авиациялық әкімшілігінің авиациялық қауіпсіздік департаменті қосымша ақпарат ұсынады. ҚР Туризм және спорт министрлігі жағдайды жіті бақылауда ұстап, жауапты мемлекеттік органдар, елшіліктер және туроператорлармен тұрақты байланысып отыр. Қажет болған жағдайда Министрлік Туристік Қамқормен және әуекомпаниялармен бірлесіп туристерді қайтаруды қамтамасыз етеді, - деді министрлік өкілдері. 

Еске салайық, Әзербайжан шекарасы арқылы Ираннан 6 қазақстандық эвакуацияланған болатын. 

Сондай-ақ бұған дейін Қазақстанның Таяу Шығыс елдеріне әуе кеңістігін жапқаны анықталды.