Тәжікстанда оппозициялық ислам партиясының түгел дерлік басшылығы қамауға алынды

АСТАНА. ҚазАқпарат - Бүгін Тәжікстанда оппозиция елдің ислам қайта өрлеу партиясының түгел дерлік басшылығының қамауға алынғаны туралы мәлімдеді.

Бұл туралы Тәжік телеграф агенттігіне сілтеме жасаған КирТАГ хабарлады.

«Тәжікстан ислам қайта өрлеу партиясы» (ТИҚП) кеңесінің түгелге жуық мүшелері ұсталды», - деп хабарланды тәжік оппозициясының порталында.

Белгілі болғандай, сәрсенбі күні кешке аталған саяи ұйым төрағасының құқық мәселелері бойынша кеңесшісі Зарафо Рахмони өз үйінде ұсталды. Сол күні күндіз Душанбе қаласында ТИҚП төрағасының бірінші орынбасары Саидумар Хусайнидің Душанбе-Алматы әуе рейсінен алынғаны, ал кешкі мезгілде партия төрағасының тағы бір орынбасары - Махмадали Хаиттің ұсталғаны туралы хабарланған.

Бұдан басқа, жергілікті БАҚ-тардың мәліметтерінше, Тәжікстан аумағынан кетуге әрекеттенген ТИҚП саяси кеңесінің мүшесі Вохидхон Косиддинов ұсталды.

«Қырғызстан елімен шекара бекеттерінің бірінде Тәжікстан аумағынан шығып кетпек болған ол мәжбүрлі түрде үйіне қайтарылып, ал кешке қамауға алынды», - делінген хабарламада.

Порталдың мәліметтерінше, қамауларды ТР қауіпсіздік органдарының қызметкерлері атқарды.