Тәжікстанда балаларға әлеуметтік желіге кіруге тыйым салынуы мүмкін

АСТАНА. KAZINFORM — Тәжікстан парламентінің депутаты Дильноза Ахмадзода 14 жасқа дейінгі балалардың әлеуметтік желіні пайдалануына толық тыйым салуды және жасөспірімдердің оны пайдалануын қатаң қадағалауды ұсынды. Оның ұсынысы «Народная газета» басылымында жарияланды. 

Депутат биыл үкімет балалар құқығын қорғау туралы заңға жалған және зиянды ақпаратқа қатысты бірқатар түзету енгізгенін айтты. Алайда ол балалар мен жасөспірімдердің әлеуметтік желілерді пайдалануын бақылау үшін басқа да түзетулер енгізу қажет деп санайды.

Ахмадзоданың ұсынысы бойынша, 14 жасқа толмаған кәмелетке толмағандардың әлеуметтік желілерге кіруіне толық тыйым салынуы керек, ал 14 пен 17 жас аралығындағы жасөспірімдер оны тек ата-анасының жазбаша келісімімен ғана пайдалана алады.

Дегенмен, сарапшылардың пікірінше, әлеуметтік желілерді пайдалануға толық тыйым салу мәселені шешпейді. Олардың пікірінше, пайдалануды реттеу мен бақылау толық тыйым салудан тиімдірек болар еді.

Еске сала кетейік, Аустралия жасөспірімдерге әлеуметтік желіні шектеді: БҰҰ қолдау білдірді. 

Түркияда 16 жасқа толмағандарға әлеуметтік желіні пайдалануға тыйым салынды.