Тек қорғаныста жатып қалмаймыз — «Қайрат» бапкері «Реал Мадридке» қарсы ойын жайлы

АЛМАТЫ. KAZINFORM — УЕФА Чемпиондар лигасының топтық кезеңі аясында 30 қыркүйек күні Орталық стадионда «Қайрат» пен «Реал Мадрид» арасындағы ойын өтеді. 

Матч алдында «Қайрат» футбол клубының бас бапкері Рафаэль Уразбахтин және команда ойыншылары Әділет Садыбеков, Александр Широбоков брифинг өткізді. Рафаэль Уразбахтин маңызды ойын алдында команданың дайындығы туралы айтты.

— Алғашқы ойында кішкене қобалжу сезілді. Бірақ қазір біз жоғары деңгейде 9 матч өткіздік. Сондықтан жігіттерде қатты уайым болады деп ойламаймын. Ажиотаж бен мұндай эмоцияларға үйреніп қалды. Қосымша қысым болмайды, қайта олар үшін мотивация болады, — деді ол.

Сондай-ақ бапкер Чемпиондар лигасының алдыңғы ойындарында қолданылған схемаға күтпеген өзгерістер енгізілмейтінін айтты.

— Мұндай қарсыластармен тек алға ұмтылып шабуылдай беру немесе керісінше тек қорғаныста жатып алу мүмкін емес екен. Мұнда тепе-теңдік керек. Оларда жеке шеберлігі мықты футболшылар көп, мұндай қарсыласқа қарсы әрекет ету оңай емес. Кей ойыншылардың қимылын жауып, өзімізге артықшылық тудыратын сәттерді ойластыру қажет. Өйткені бір-бірге қалып, қорғаныс жасау қиынға түседі. Бірақ біз тек қорғаныста отыра бермейміз. Барлық матчта шабуыл мен қорғанысты қатар алуға тырысып келеміз, — деді ол.

Рафаэль Уразбахтин Чемпиондар Лигасының 15 дүркін чемпионы Қазақстанға келуі — бүкіл қазақстандық футбол үшін тарихи оқиға екенін атап өтті.

— Қуаныштысы, матч Алматыда өтеді. Жанкүйерлер бұрын тек теледидар арқылы көрген әлемдік футбол жұлдыздарын көзбе-көз көре алады. Бұл ойынды біз үлкен үмітпен күтіп отырмыз. Сондықтан лайықты өнер көрсетуге тиіспіз. Қазір қандай да бір нәтиже туралы айтқым келмейді, бірақ ең бастысы — сапалы ойын көрсетуіміз керек, — деді ол.

Еске салайық, бұған дейін «Қайрат» қақпашылары Темірлан Анарбеков пен Заруцкийдің жағдайы қалай екенін жазғанбыз.