Тексерістен кейін нәтиже бар ма: Алакөл жағажайындағы жағдай қандай
СЕМЕЙ. KAZINFORM — Kazinform тілшісі Абай облысы Мақаншы ауданындағы Алакөл демалыс орнына арнайы барып, фоторепортаж жасап қайтты.
Жаз шыға салысымен Алакөл жағасына ағылатын халық қарасы көп. Тамыз айында да сол. Суы тұзды, балшығы шипалы көлге отбасымен келетіндер көп. Демалыс базаларының біріне жайғасып, орамалдарын иыққа іліп, жағаға қарай тартады.
Бірақ осы демалыс орнында туристерге қаншалықты жағдай жасалған? Президент Қасым-Жомарт Тоқаев Алакөлдің демалушыларды қарсы алуға дайындығы төмендігін айтқан сынынан кейін мұнда қандай өзгеріс бар? Осыны көру үшін көл жағасына арнайы табан тіредік.
Ең әуелі күндіз арбатқа бардық. Ортасында күннен көлегейлеп тұратын шатыры бар орындықтар, ал екі шетінде түрлі тағам мен тәттілерді ұсынатын сауда орындары орналасқан бұл арбатта адам негізінен қас қарайғанда көбейеді. Себебі күн шығып тұрғанда елдің бәрін жағалаудан іздейсіз.
Арбат іші таза. Әр бұрышта қоқыс салғыштар тұр.
Әжетхананың қайда екені жазылған тақтайшаларды байқадық.
Бұрын әр жерде тұратын кәуәпханалар азайған. Оның орнына балмұздақ, салқындатылған тәтті сусындар, вафли мен фаст-фуд саудасы қызып тұр.
Туристік полиция бекеттері тұрғанымен ішінде де, сыртында да сақшыларды көрмедік.
Бәлкім содан да шығар, жол ережесін сақтамайтын жүргізушілерді көзіміз шалды. Мысалы, бұл көлік жаяу жүргіншілер жүретін жолмен емін-еркін келе жатыр.
Жалпы арбат іші таза болғанымен жерде жатқан қоқыс та жоқ емес.
Бірнеше метр сайын киім ауыстыратын орындар тұр. Жалпы мұнда барлығы 25 киім ауыстыратын орын бар екен.
Әжетхананың қайда екенін бағыт берген тақтайшалар арқылы таптық. Кіру бағасы — 100 теңге. Қолма-қол ақшаңыз болмаса мобильді аударым жасауға болады.
Ішіне кіріп көрдік. Таза. Әжетхана қағазы бар. Қол жуатын сұйық сабын да тұр. Бірақ әжетхана санын тағы арттыру керек секілді.
Облыс әкімдігі биыл жағалаудағы санитарлық тораптар саны 8-ден 18-ге дейін көбейтілетіндігін мәлімдеген. Әсте дұрыс. Себебі бір әжетханаға біршама кезек қалыптасып қалады. Оның үстіне әжетханалар арасындағы қашықтық та ұзақ.
Алакөлде түрлі аттракциондарға отыруға болады. Бірақ бағалары қымбаттау көрінді. Мысалы, аққуға отырып айналатын мына аттракционның бағасы адам басына — 2 мың теңге.
Ал көл жағасындағы жұрт қарасы қалың. Айтпаса да түсінікті, елдің бәрі суға шомылып, күнге қыздырынып жатыр.
Қайыққа, катамаранға, катерге отыруға болады.
Тіпті түйемен қыдыртатындар да жүр.
Кешке қарай арбатқа тағы келдік. Бағана айтқанымыздай, күндізге қарағанда адам қарасы күрт көбейген.
Караокеде ән айтып, садақ атып, ұлттық киім киіп фотоға түсуге және ақша ұтып алуға болатын ойындар ойнауға мүмкіндік бар.
Суретшіге ақша төлесеңіз суретіңізді айнадай қылып салып береді.
Балалар үшін де қызықтың түрі мол.
Сауданың сәнін келтіріп жатқандар жетерлік. Ойыншықтар, кәдесыйлар, түйе жүнінен тігілген киім-кешек, табиғи тастардан жасалған әшекейлер көз тартады.
P/S: Қорыта айтқанда, Алакөлде оң өзгерістер барын байқадық. Десе де әлі орны толуы тиіс олқылықтар жоқ емес. Айтпақшы, күндіз полицейлер байқалмағанымен кешке толып жүрді. Бір мас адамды төрт сақшының әкетіп бара жатқанын көрдік. Демалушылардың қауіпсіздігі қамтамасыз етіліп, тазалық сақталып, әжетханалар саны көбейсе — Алакөл жағасына ағылатын турист саны арта берері сөзсіз.
Еске салсақ, осыған дейін жаз шыққалы бері Алакөл жағасында 120-дан астам бала жоғалғаны хабарланған.
