Telegram соңғы үш жылда алғаш рет үлкен табысқа кенелді

АСТАНА.KAZINFORM — 2024 жыл мессенджер үшін өте табысты жыл болды. Бұл туралы оның негізін қалаушы Павел Дуров мәлім етті.

Павел Дуровтың айтуынша, мессенджер монетизацияның үш жылында алғаш рет пайда әкеле бастады.

— Биыл Telegram Premium жазылушыларының саны үш есеге өсіп, 12 миллионнан асты. Жарнамадан түсетін табысымыз да бірнеше есе өсті. Нәтижесінде 2024 жылы Telegram-ның жалпы табысы 1 миллиард доллардан асты, біз жылды крипто-активтерді есептемегенде 500 миллион доллардан астам ақша қорымен аяқтаймыз, — деді Павел Дуров Telegram арнасында.

Ол төрт жыл ішінде Telegram шамамен 2 миллиард доллар қарыздық міндеттемелер шығарғанын және оның айтарлықтай бөлігі осы күзде өтелгенін атап өтті.

Біз бұған дейін Қазақстанда Telegram кеңсесі ашылатынын хабарлаған болатынбыз.