Теміржолды кесіп өтпек болған ер адамды пойыз басып кетті
АСТАНА. KAZINFORM — 28 ақпан күні сағат 21:46–да Боранқұл станциясында оқыс оқиға болып, пойыз ер адамды басып кетті. Бұл туралы «Қазақстан темір жолы» АҚ баспасөз қызметі мәлім етті.
Осыған орай ҚТЖ темір жол бойында қаупсіздік ережесін сақтауды сұрайды.
— Теміржолды белгіленбеген орыннан кесіп өтпек болған адамның әрекеті осындай қайғылы оқиғаға себеп болды. Ер адам Бейнеу аудандық ауруханасына жеткізілді. Оқиға туралы ақпарат Маңғыстау желілік полиция бөлімшесіне жеткізілді, — делінген хабарламада.
ҚТЖ темір жол — қауіптілігі жоғары аймаққа жататынын ескертеді. Былтыр жаяу жүргіншіні пойыз басып кетудің 75 оқиғасы тіркелген. Негізігі себеп — темір жол өткелдерін кесіп өту ережесінің бұзылуы, мас күйде болу немесе құлаққап киіп өту, суицид.
Жаяу жүргіншілерге келесідей ережелерді сақтау ескертілді:
— теміржолды тек қана белгіленген орыннан кесіп өту;
— өте сақ бол;
— құлаққап пайдаланбау, темір жолға жақын маңайда гаджетке алаңдамау.
Ережені ұстану трагедиядан сақтануға көмектеседі.
Бұған дейін хабарланғандай, Жамбыл облысында екі теміржолшыны пойыз басып кеткен еді.
