Теңіз кенішінде күкірт қоры қалған жоқ

АТЫРАУ. ҚазАқпарат - Атырау облысындағы Теңіз және Королев кеніштерін игеріп жатқан «Теңізшевройл» ЖШС кәсіпшілік аумағында бұрын қордаланып, тау-төбе болып тұрған күкірттің соңғы легін жөнелткенін жариялады.

«Көп жылдар бойы біз Теңізге үйілген күкірт тауларын көріп келдік. 2006 жылы оның ашық алаңдарда сақталған қоры 9 млн. тоннадан асып, аймақ тұрғындарының алаңдаушылығын туғызды. Біздің біріміз де бұл қорды әкетіп тауыса алмайтындай көрдік. Бірақ та ТШО-ның және мердігерлік ұйымдардың шалымды жұмыстары мен ойдағыдай жүзеге асырылған жобалардың нәтижесінде біз күкірттің соңғы тонналарын тиеп жөнелттік», - деді ҚР энергетика вице-министрі Ұзақбай Қарабалин.

«Жобаның ойдағыдай орындалуын қамтамасыз еткен ТШО-ның маркетинг және тасымалдау бөлімінің, өндірістік бөлімінің, сондай-ақ «Ариадна» ЖШС мен «Денхолм Жолдас» ЖШС мердігерлерінің жұмысын атап өткім келеді. Олардың қарқынды жұмысының арқасында Қазақстан күкіртті ірі жеткізушілердің ондығына кірді», - деп атап көрсетті ТШО бас директоры Тим Миллер.

Қазіргі кезде Теңізде тәулігіне 6 мың тоннадан астам жиынтық қуаты бар күкіртті түйіршіктейтін бес қондырғы пайдаланылуда. Олар кеніштен құрамында 13 пайыз күкіртті сутегі бар мұнайды өндіру үдерісінде алынған күкіртті толық өңдеуді қамтамасыз етеді.