Теннис: Андрей Голубев Мароккодағы турнирдің жартылай финалында

НҰР-СҰЛТАН. ҚазАқпарат – Қазақстандық Андрей Голубев жұптық сында Марракеш (Марокко) ATP 250 турнирінің жартылай финалына шықты, деп хабарлайды ҚазАқпарат тілшісі.

Қазақстандық теннисші франциялық Фабрис Мартенмен бірге ширек финалда марокколықтар Ламин Уахаб – Эллиот Беншетримен шеберлік байқасты.

Жарыстың 1-ракеткалары болып тіркелген А.Голубев пен Ф.Мартен қарсыластарын 6:3, 7:6 (7:4) есебімен ұтты. Бір сағаттан астам уақытқа созылған бәсекеде олар 6 эйс жасап, 6 брейк-пойнттың біреуін пайдалана алды.

Осылайша Марракеш додасының жартылай финалында жұптық сында қос қазақстандық ойнайды.

Александр Недовесов пен пәкстандық Айсам Куреши бразилиялық Рафаэль Матос – испаниялық Давид Вега-Эрнандеспен финалға шығу үшін таласады. Ал А.Голубев пен Ф.Мартеннің қарсыластары – италиялық Андреа Вавассори мен Польша өкілі Ян Зелински.

Тағы бір қазақстандық Дмитрий Попко Португалиядағы Оэйраш челленджер жарысында жекелей сында мажарстандық Жомбор Пироштан 5:7, 4:6 есебімен жеңіліс тауып, ширек финалға шыға алмай қалды.

Еске сала кетейік, бұдан бұрын қазақстандық теннисшілердің Мароккодағы жарыстың ширек финалына шыққанын, Елена Рыбакинаның АҚШ-тағы турнирдің үшінші айналымына өте алмағанын жазған болатынбыз.

Сондай-ақ Қазақстан жасөспірімдер құрамасы Аустралияға жол берді.

Александр Недовесов Мароккодағы турнирдің жартылай финалына шықты.