Теннис: Михаил Кукушкин Индиан-Уэллс турнирін сәтті бастады

НҰР-СҰЛТАН. ҚазАқпарат – Қазақстандық Михаил Кукушкин Индиан-Уэллс мастерс турнирінің іріктеу сайысын сәтті бастады, деп хабарлайды ҚазАқпарат тілшісі.

Дүниежүзілік рейтингте 154-орында тұрған М.Кукушкин іріктеу сайыстарының жартылай финалында әлемнің 122-ракеткасы, италиялық Андреас Сеппимен кездесті.

Қазақстандық теннисші 6:2, 6:4 есебімен екі сетте жеңіске жетті.

Сағат жарымнан астам уақытқа созылған бәсеке барысында М.Кукушкин 2 эйс жасап, 9 брейк-пойнттың үшеуін пайдаланды.

М.Кукушкин іріктеу сайыстарының финалында әлемнің 93-ракеткасы, жапониялық Есихито Нисиокамен кортқа шығады. Оны жеңсе, әлемнің маңдайалды теннисшілері бақ сынайтын негізгі турнирге жолдама алады.

Тағы бір қазақстандық Дмитрий Попко іріктеу сайысында колумбиялық Даниэль Элахи Галан Риверостан 4:6, 5:7 есебімен жеңіліп қалды.

Қазақстанның бірінші, әлемнің 33-ракеткасы Александр Бублик рейтингісі жоғары болғандықтан, Индиан-Уэллс турнирін екінші айналымнан бастайды.

Әйелдер арасындағы осы жарыста Қазақстаннан Елена Рыбакина, Юлия Путинцева бақ сынайды.

Еске сала кетейік, бұдан бұрын Заңғар Нұрланұлының Еуропа рейтингісінде үш ай бойы көш бастап келе жатқанын жазған болатынбыз.