Теннис: Путинцева Гамбург турнирінде жеңіліп қалды
Осы доданың 2-ракеткасы болып тіркелген Ю.Путинцева жарысты екінші айналымнан бастап, рейтингте 130-орында тұрған германиялық Андреа Петковичпен кездесті.
Бірінші партияда қос бірдей брейкке қол жеткізген корт иесі басымдылық көрсетті – 6:2.
Есесіне екінші сетте қазақстандық теннисші үш брейк жасады – 6:1.
Үшінші, шешуші партияда әуелі германиялық спортшы 2:0 есебімен алға шыққанымен, Ю.Путинцева таразы басын теңестіре алды. Есеп 3:3 болғаннан кейін қарсыластар брейкпен алмасты. Бұдан кейін тағы бір брейк жасаған германиялық теннисші матчқа доп бергенде, өз мүмкіндігін жіберген жоқ – 6:4.
Тартысты бәсеке 2 сағат 15 минутқа созылды.
А.Петкович жартылай финалға шығу үшін рейтингте 128-сатыдағы бельгиялық Исалин Бонавантюрмен таласады. Ол екінші айналымда әлемнің 74-ракеткасы, америкалық Бернарда Пераны 3:6, 6:3, 6:4 есебімен тізе бүктірді.
Еске сала кетейік, бұдан бұрын қазақстандық жас теннисшінің елордада халықаралық турнирдің ширек финалына шыққанын жазған болатынбыз.
Сондай-ақ қазақстандық тағы бір теннисші Италиядағы турнирдің ширек финалына өтті.