Теннис: Юлия Путинцева «Ролан Гаррос» турнирінің ширек финалына шықты

АСТАНА. ҚазАқпарат - «Ролан Гаррос» турнирінің төртінші айналымында қазақстандық Юлия Путинцева әлемнің 26-ыншы ракеткасы, чехиялық Барбора Стрыцовамен кездесті, деп хабарлайды ҚазАқпарат тілшісі.

Қазіргі кезде дүниежүзілік рейтингте 98-інші орында тұрған Ю.Путинцева 23 жаста болса, Б.Стрыцова - одан тура тоғыз жасқа үлкен, тәжірибесі мол спортшы.

Бірінші партияда екінші геймде Юлия доп берген кезде ойын аса тартысты өрбіп,  қазақстандық теннисші таразы басын өзіне аудара білді. Содан кейін брейк жасап, өзінің геймін де бермей, 3:1 есебімен алға шықты. Бесінші геймде үш бірдей брейк-пойнтты пайдаланбай, басымдылығын одан сайын ұлғайтатындай мүмкіндікті мүлт жіберді - 3:2. Дегенмен сосын өзінің геймін алумен бірге тағы бір брейкке қол жеткізді - 5:2. Бірақ қарсыласы да қарап қалмай, есепті қысқарта алды. Әйтеуір Путинцева бұл партияны жеңіспен аяқтай білді - 6:4.

Екінші партияда бастапқыда алғашқы сеттегі көрініс қайталанды. 1:1-ден кейін Ю.Путинцева екі мәрте брейк жасап, есепті 4:1-ге жеткізді.  Әйтсе де чехиялық теннисші есепті қысқартты - 3:4. Бұдан кейін Юлия өз геймін алумен бірге тағы бір брейк жасап, кездесу нүктесін қойды - 6:3.

Матч барысында чехиялық теннисші жиі қателікке бой алдырып, жүйкесі де сыр берсе, Юлия барынша сабырлы ойнады.

Осылайша Ю.Путинцева екінші рет «Ролан Гаррос» турнирінің ширек финалына шығып отыр. Бұдан екі жыл бұрын Ю.Путинцева небәрі 21 жасында «Ролан Гаррос» турнирінің ширек финалына дейін жеткен еді. Онда әлемнің сол кездегі бірінші ракеткасы, америкалық Серена Уильямсті алғашқы партияда ұтқанымен, содан кейінгі екі сетте есе жіберген болатын.

Қазақстандық теннисші ширек финалда әлемнің 13-інші ракеткасы, америкалық Мэдисон Кизбен шеберлік байқасады.

Бір атап өтерлігі, «Ролан Гаррос» турнирінен кейін Ю.Путинцева әлемдік рейтингтегі жағдайын жақсартатыны анық.

Еске сала кетейік, бұдан бұрын Ю.Путинцеваның төртінші айналымға шығып, қарсыласы анықталғанын жазған болатынбыз.