Теннис: Юлия Путинцева жұптық сында Осака турнирінің финалына шықты
Қазақстандық теннисші ресейлік Анна Калинскаямен бірге жартылай финалда жарыстың 2-ракеткалары, корт иелері Эри Ходзуми – Макото Ниномиямен шеберлік байқасты.
Бұл матч Ю.Путинцеваға да, А.Калинскаяға да оңайға түскен жоқ. Өйткені олар бүгін осының алдында жекелей сында өнер көрсетті.
Дүниежүзілік рейтингте 88-орында тұрған Юлия Путинцева ширек финалда үш сағатқа жуық уақытқа созылған тартысты бәсекеде әлемнің 39-ракеткасы қытайлық Синьюй Ванға жол берді – 6:7 (4:7), 7:6 (7:1), 3:6. Ал әлемнің 92-ракеткасы А.Калинская рейтингте 123-сатыдағы АҚШ өкілі Эшлин Крюгерден ойсырай ұтылды – 3:6, 1:6.
Бұлардың жұптық сындағы кездесуі де шиеленіспен өтті. Бірінші партияда тай-брейкте жапониялық жұп әбжілдік танытты – 7:6 (7:3). Екінші сетте есеп 5:3 болған мезетте олар матчқа доп берді. Міне, дәл осы сәтте жинала біліп, жанкештілік танытқан Путинцева мен Калинская таразы басын теңестіріп қана қоймай, тай-брейкте айқын басымдылық көрсетті – 7:6 (7:1). Содан кейін супер тай-брейкте жеңісті жұлып алды – 10:7.
Екі сағат 9 минутқа созылған бәсеке барысында қазақстандық-ресейлік жұп 10 брейк-пойнттың жетеуін мүлт жіберген жоқ. Жапониялық дуэт 1 эйс, 7 брейкпен (7 брейк-пойнт) көзге түсті.
Осылайша, қазақстандық теннисші бір күнде екі матчта бес сағат бойы ойнады.
Юлия Путинцева мен Анна Калинская финалда германиялық Анна-Лена Фридзам – украиналық Надежда Киченокпен бас жүлдені сарапқа салады.
Еске сала кетейік, бұдан бұрын Қазақстан теннис құрамасының Дэвис кубогіне дайындықты бастағанын жазған болатынбыз.
Сондай-ақ Юлия Путинцева жұптық сында Осака жарысының жартылай финалына шықты.
Қазақстан құрамасының капитаны Юрий Щукин Дэвис кубогінде күтпеген нәтиже болуы мүмкін екендігін айтты.