Теннис: Зарина Дияс Чикаго турнирінде жеңіліп қалды
Дүниежүзілік рейтингте 110-орында тұрған З.Дияс алғашқы айналымда әлемнің 57-інші, осы жарыстың 7-ракеткасы, франциялық Кристина Младеновичпен күш сынасты.
Бірінші сетте франциялық спортшы басымдылық көрсете білді – 6:2.
Тартысты өткен екінші партия барысында Зарина брейк-пойнттар ғана емес, сетболды да мүлт жіберді. Ақыры тай-брейкте К.Младенович жеңісті жұлып алды – 7:6 (7:3).
2 сағат 12 минутқа созылған бәсекеде З.Дияс 3 эйс жасап, 10 брейк-пойнттың екеуін ғана пайдаланды. Қарсыласы 2 эйске қоса 10 брейк-пойнттың төртеуін өз есебіне жазды.
К.Младенович екінші айналымда рейтингте 361-сатыдағы канадалық Франсуа Абандамен шеберлік байқасады. Ол бастапқы кездесуінде әлемнің 65-ракеткасы, черногориялық Данка Ковиничті ұтып кетті.
Жүлде қоры 235 мың АҚШ долларынан асатын Чикаго додасы 30 тамызда мәреге жетеді. Бұл – «Үлкен дулыға» турнирінің бірі US Open алдындағы соңғы жарыс.
Еске сала кетейік, бұдан бұрын Зарина Диястың Чикагода негізгі турнирге жолдама алғанын, қазақстандық теннисшілердің әлемдік рейтингіде жоғары көтерілгенін жазған болатынбыз.