Теннистен Индиан-Уэллс турнирі: Рыбакина кімдермен кездесуі мүмкін
АСТАНА. KAZINFORM — Қазақстандық теннисшілер ерлер мен әйелдер арасында өтетін Индиан-Уэллс (АҚШ) турнирінде бақ сынайды.
Әйелдер арасында қазақстандықтар алдымен әлемнің 7-ракеткасы Елена Рыбакинаға үміт артатыны белгілі.
Бұдан екі жыл бұрын финалда әлемнің қазіргі 1-ракеткасы, Беларусь өкілі Арина Соболенконы 7:6 (13:11), 6:4 есебімен жеңген Е.Рыбакинаның чемпион атанғаны белгілі. Өткен жылы осы WTA 1000 жарысына қатыспаған қазақстандық теннисші биыл жетінші ракетка ретінде бәйгеге қосылады.
Доданы екінші айналымнан бастайтын Е.Рыбакина әлемнің 50-ракеткасы, чехиялық Мария Боузкова немесе рейтингіде 64-орында тұрған нидерландылық Сюзан Ламенстің қай жеңгенімен жолығады. Содан кейін сәтті өрбісе, ұлыбританиялық Кэти Бултер, ресейлік Мирра Андреева тап келуі ықтимал.
Өткен айда Дубай (БАӘ) WTA 1000 турнирінде Е.Рыбакина жартылай финалда дәл осы 17 жастағы ресейлік спортшыға есе жіберген болатын. Сондай-ақ Индиан-Уэллсте аузымен құс тістеген америкалық Джессика Пегула, поляк Ига Швентек және А.Соболенконың қай-қайсысы да чемпиондық атақтан үмітті.
Өткен жылы төртінші айналымға дейін жетіп, И.Швентекке жол берген Юлия Путинцеваға сол рейтингілік ұпайын қорғау оңайға түспейді. Осы дүйсенбіде жаңартылған рейтингіде ТОП-20-ға қайта кірген, доданың 21-ракеткасы болып тіркелген Ю.Путинцева да екінші айналымнан бастайды. Ол әлемнің 59-ракеткасы, тағы бір чехиялық Катержина Синякова немесе іріктеу сайысы жеңімпаздарының бірімен шеберлік байқасады.
ATP рейтингісінде соңғы кезде сәтсіз өнер көрсетіп жүрген Қазақстанның бірінші ракеткасы Александр Бублик 51-ден 82-ге, Александр Шевченко 95-тен 98-ге сырғып кеткен болатын. Өткен жылы Индиан-Уэллс мастерс турнирінде Бублик үшінші, Шевченко екінші айналымнан аса алмаған еді. Биыл сол олқылықтың орны тола ма, оны алдағы ойындар көрсетеді.
Қазақстандық теннисшілерден кортқа бірінші болып А.Шевченко шығады. Оның қарсыласы — әлемнің 83-ракеткасы, жапониялық Ринки Хиджиката.
А.Бублик іріктеу сайысы жеңімпаздарының бірімен сынға түседі.
Тағы бір қазақстандық, әлемнің 166-ракеткасы Михаил Кукушкин іріктеу финалында рейтингіде 394-сатыдағы италиялық Джулио Зеппиериге 6:7 (6:8), 2:6 есебімен жол беріп, негізгі жарысқа өте алмай қалды.
Еске сала кетейік, бұдан бұрын Тимофей Скатовтың Грекиядағы турнирдің екінші айналымына өткенін жазған болатынбыз.
