«Теңіз» кен орнынан Қара теңізге мұнай жеткізетін құбыр тұсында балық қырылды

АТЫРАУ. KAZINFORM – Атырау облысындағы «Теңіз» кен орнынан Қара теңіз жағалауына мұнай жеткізетін құбыр тұсында балық қырылды.

Жайық-Каспий облысаралық бассейндік балық шаруашылығы инспекциясының мәліметінше, Атырау облысының Жылыой ауданындағы «Теңіз-Новороссийск» мұнай құбырының 64-ші және 72-ші шақырымында балық қырылған. Бұл дерек 7 тамызда анықталған.

«Балықтың қырылуы туралы өзара іс-қимыл схемасына сәйкес барлық мүдделі мемлекеттік органға хабар берілді. Арнайы комиссия мүшелері балық шабағы қырылған жерге барды. Жергілікті атқарушы органдармен бірге санитарлық нормаларға сәйкес қырылған балық шабақтары жиналып алынды. Жиналып алынған шабақтардың салмағы – 127 килограмм», - деп хабарлады облысаралық инспекциядан. 

Атырау облысы бойынша экология департаментінің мамандары зертханалық зерттеу жүргізу үшін судан сынамалар алды. Алайда, қырылған шабақтардың өлексесі түгі қалмай ыдыраған. Сол себептен, балықтың қырылу себептерін анықтау үшін өлекселерден сынама алу мүмкін болмаған. 

«Балық шабақтарының қырылуының болжамды себебі – суда оттегінің жетіспеушілігі. Көктемгі су тасқыны кезінде Жем өзені арнасынан асып тасыды. Соның салдарынан шабақтар өзен суымен таяз ойықтарға шығып, жиналып қалған», - деп мәлім етті облысаралық инспекциядан. 

Еске сала кетелік, бұған дейін Атырау маңындағы каналда балық оттегінің жетіспеушілігінен қырылуы мүмкін екенін хабарлаған болатынбыз.