Tesla акциялары еуропалық сатылым төмендегеннен кейін арзандады
АСТАНА. KAZINFORM – Қаңтар айында Еуропалық Одақ пен Ұлыбританиядағы сатылым екі есеге дерлік қысқарғаннан кейін Tesla электромобиль өндірушісінің акциялары 9%-ға арзандады, деп хабарлайды BBC.
Tesla акциялары бағасының төмендеуі компанияның құнын 2024 жылдың қарашасынан бері алғаш рет 1 трлн доллардан төмен түсірді. Америкалық Tesla еуропалық нарықта қытайлық және басқа да автоөндірушілермен қатаң бәсекелестікке тап болып отыр.
Еуропалық автомобиль өндірушілер қауымдастығының (Acea) мәліметінше, Tesla-ның қаңтардағы сатылымы Еуропада бұл айда үштен бірінен астамға өскен электромобильдер сатылымының тенденциясын төмендетті.
Tesla-ның ЕО, Еуропалық еркін сауда қауымдастығы елдері мен Ұлыбританиядағы сатылымы 45%-ға, ал тек ЕО-да 50%-ға төмендеді. Бұл Tesla-ның жалпы сатылымы өткен жылы сұраныстың әлсіреуі мен бәсекелестіктің күшеюіне байланысты 10 жылдан астам уақыт ішінде алғаш рет төмендегенімен байланысты болып отыр.
AJ Bell инвестициялық директоры Расс Моулдтың пікірінше, қаңтардағы сатылымның төмендеуінің негізгі факторы бәсекелестіктің өсуі болуы мүмкін. Оның айтуынша, қытайлық BYD автомобиль өндірушісі, соның ішінде басқа автомобиль өндірушілері қосымша ақы алатын мүмкіндіктерді стандарт ретінде қосу арқылы үлкен жетістіктерге жетті.
Алайда аталған маманның пікірінше, кейбір сатып алушылар Масктың саяси мәлімдемелеріне байланысты «принципті ұстанымды» қабылдаған болуы мүмкін.
Маск АҚШ-та федералды қаржыландыруды күрт қысқартуға күш салуымен назар аудартты. Ұлыбританияда ол Томми Робинсон деген атпен белгілі түрмедегі оңшыл белсенді Стивен Яксли-Леннонды қолдап, премьер-министр Кейр Стармерді бірнеше рет сынға алды. Германияда Маск әсіре оңшыл «Германия үшін балама» (AfD) партиясын қолдайды және оның жетекшісін партия үшін рекордтық нәтиже — сайлаудағы екінші орнымен құттықтады.
Моулдтың айтуынша, Tesla-ның позициясын әлсірететін басқа да саяси факторлар бар.
Масктың Дональд Трамппен жақын қарым-қатынасының арқасында АҚШ-тағы сайлаудан кейін компанияның акциялары күрт өсті. Ол өзін президенттің «бірінші досы» (first buddy) деп атады.
Инвесторлар бұл Tesla бизнесіне пайда әкеледі деп үміттенді. Алайда Трамп электромобильдерді жақтаушылар қатарына кірмейді.
Бұған дейін Tesla Шанхайда Megapack аккумуляторлары өндірісін іске қосқанын жазған болатынбыз.
