Тимофей Скатов Үндістандағы турнирдің финалына шықты

АСТАНА. KAZINFORM — — Қазақстандық теннисші, әлемнің 235-ракеткасы Тимофей Скатов Бангалор (Үндістан) челленджер турнирінің финалына жолдама алды. 

Қазақстандық теннисші жартылай финалда әлемнің 167-ракеткасы, франциялық Гарольд Майомен соңғы бәсекенің жолдамасын сарапқа салды.

Қарсыласының рейтингіде жоғары тұрғанына қарамастан, Т.Скатов 6:4, 6:3 есебімен сенімді түрде жеңіске жетті.

Бір сағат 15 минутқа созылған матчта Скатов 3 эйспен бірге 2 брейк-пойнттан шашау шығарған жоқ. Майо 6 эйс жасағанымен, 2 брейк-пойнтты пайдалана алмады.

Тимофей Скатов финалда әлемнің 96-ракеткасы, испаниялық Педро Мартинес Портеромен кездеседі. 

Т.Скатов қазіргі кезде ATP Live рейтингісінде 195-орынға көтеріліп, ТОП-200-ге кіріп тұр.

Тағы бір қазақстандық, әлемнің 313-ракеткасы Михаил Кукушкин Ноттингем (Ұлыбритания) челленджер турнирінің финалына шыға алмады. Ол жартылай финалда 233-ракеткасы, корт иесі Йоханнус Мандэйге есе жіберді — 4:6, 2:6.

Еске сала кетейік, бұдан бұрын Александр Бубликтің Гонконг турнирінің жартылай финалына өткенін жазған едік. 

Брисбен турнирінде Елена Рыбакина жартылай финалдан тыс қалды.