Тиранадан кейін Албанияның басқа қалаларында да наразылық акциялары басталды
АСТАНА. KAZINFORM — Албания үкіметіне қарсы және білім беру жағдайын жақсартуды талап еткен студенттердің наразылық акциялары астана Тиранадан басталып, елдің бірнеше қаласына таралды. DW хабарлауынша, 15 қазанда Шкодер, Корче және бірнеше жағалаудағы қалаларда наразылық акциялары өтті.
Тиранада полициямен қақтығыс үшінші күн қатарынан жалғасты. Демонстранттар тас лақтырып, дүкен терезелерін сындырып, тосқауыл орнатып, қоқыс жәшіктерін өртеді. Полиция су шашатын зеңбіректерді және көзден жас ағызатын газды қолданды.
Шкодерде наразылық білдірушілер қалалық әкімдік ғимаратының терезелерін сындырып, Социалистік және Демократиялық партиялардың кеңселеріне тас лақтырды. Корчеде мектеп терезелері сындырылып, көшелер жабылды. Бірнеше жерде полициямен қақтығыс болды.
Наразылық білдірушілер премьер-министр Эди Раманың отставкаға кетуін, білім беру жағдайларын жақсартуды, оқу ақысын төмендетуді және елдегі сыбайлас жемқорлықты тоқтатуды талап етіп жатыр.
Полицияның мәліметінше, 14 қазанда полиция қызметкерлеріне, мемлекеттік органдарға, мемлекеттік мекемелерге және жеке меншікке шабуыл жасады деген күдікпен 65 адам ұсталды. Денсаулық сақтау министрлігі 61 полиция қызметкерін қоса алғанда, 89 жәбірленушіге медициналық көмек қажет екенін хабарлады.
Рама наразылық акциялары кезіндегі зорлық-зомбылық үшін оппозицияны кінәлап, университет кампусындағы қирау «студенттердің әрекеттерінің нәтижесі болуы мүмкін емес» деп мәлімдеді. Албаниядағы жаппай наразылықтар мамыр айының соңынан бері жалғасып келеді.
Албания астанасы Тиранадағы үкімет пен білім министрлігі ғимараттарының алдындағы жаппай шерулердің арты құқық қорғау органдарымен қақтығысқа ұласқанын жазған едік.
